Exit OAVID
Saír

Se precisas SAÍR RÁPIDO de esta web, fai click no botón

Saír de OAVID
SAÍR

Estará sempre dispoñible na parte dereita das páxinas. Ao pinchar sobre él, levarate a un contido distinto.

Portal OAVID
Suxestións
    Mostrar máis
    De interese

    Respondemos as túas dúbidas

    Que facer se son vítima dun delito?

    Se fuches vítima dun delito recomendámosche seguir estes pasos:
    1. Busca seguridade inmediata:
      Se te atopas nunha situación de risco, afástaste e busca un lugar seguro. Se é necesario, chama á policía ou a un servizo de emerxencia.
    2. Denuncia o delito:
      É importante denunciar o delito o antes posible ante as autoridades. Isto pódese facer nunha comisaría de policía ou a través dunha denuncia en liña se o sistema o permite.
    3. Busca atención médica, se é necesario:
      Se resultaches ferido busca asistencia canto antes. Nalgúns casos, a atención médica tamén pode ser crucial para documentar calquera lesión física e fortalecer a denuncia.
    4. Garda as probas:
      Se é posible, preserva as probas do delito, como obxectos, fotos, mensaxes ou calquera cousa que poida servir como evidencia. No caso de haber testemuñas, tenta obter a súa información de contacto.
    5. Busca apoio emocional:
      É normal sentirte angustiado. As Oficinas das vítimas de delitos ofrecemos servizos de apoio emocional para axudarche a superar o trauma.
    6. Infórmate sobre os teus dereitos:
      Tes dereitos legais que che protexen. Podemos proporcionarche información sobre os teus dereitos, que inclúen a protección, a asistencia legal e a posibilidade de recibir compensación nalgúns casos.
    7. Accede a recursos de apoio legal:
      Se precisas axuda para presentar unha denuncia ou entender o proceso xudicial, algunhas OAVD contan con servizos legais ou poden derivarte a profesionais que che asesoren en todo momento.
    8. Solicita protección se é necesario:
      En situacións onde a vítima poida correr risco de represalias ou máis danos, as autoridades ou as OAVD poden ofrecer medidas de protección como ordes de restrición, reubicación temporal ou apoio no caso de violencia doméstica.
    9. Mantente en contacto coa OAVD:
      Para calquera dúbida ou para máis información, ponte en contacto con nós (en calquera OAVD). Podemos ofrecerche o apoio necesario en cada fase do proceso.

    Onde podo acudir para obter información sobre o exercicio dos meus dereitos ante os órganos xudiciais?

    Unha das formas para obter información sobre o exercicio deses dereitos é acudir ás Oficinas de Asistencia á Vítima e Atención ao Cidadán.

    Onde se atopan as Oficinas de Asistencia á Vítima e Atención ao Cidadán?

    Hai oficinas en A Coruña, Santiago de Compostela, Ferrol, Lugo, Ourense, Pontevedra e Vigo. Podes consultar os seus datos de contacto na Rede de Oficinas.

    Podo acudir á Oficina de Asistencia á Vítima e Atención ao cidadán aínda que non sexa vítima dun delito?

    Si. Aínda que vostede non sexa vítima dun delito nin sexa parte nun procedemento xudicial pode acudir a esta oficina, onde se lle informará de cuestións de índole xeral ou se lle remitirá ao órgano competente para resolver as súas dúbidas.

    Só se considera vítima dun delito, aos efectos de ter os dereitos sinalados no Estatuto da Vítima, quen sofre persoalmente o dano ou prexuízo producido polo delito?

    Non. O Estatuto da Vítima considera vítima quen sofre directa e persoalmente os efectos do delito (tanto se son danos persoais, incluídos os danos emocionais, como calquera prexuízo económico causado directamente pola súa comisión).
    Pero tamén se aplican as súas disposicións ás vítimas indirectas, considerando como tales, no caso de producirse a morte ou desaparición dunha persoa e cando concurran as circunstancias previstas para cada caso: ao seu cónxuxe non separado legalmente ou de feito (ou persoa unida por análoga relación de afectividade) e aos fillos/as de calquera deles; aos seus proxenitores e parentes en liña recta ou colateral dentro do terceiro grao; ás persoas suxeitas á súa tutela ou curaduría ou que se atopasen baixo o seu acollemento familiar e aos demais parentes en liña recta e aos seus irmáns/ás, con preferencia, entre eles/elas, do que exercera a representación legal da vítima.

    Podo acudir á Oficina de Asistencia á Vítima e Atención ao Cidadán para informarme sobre un feito respecto do cal non existe un procedemento xudicial aberto?

    Si. No caso de que esta oficina non poida facilitarlle a información que vostede solicita derivarallo ao órgano competente.

    Que información podo obter na Oficina de Asistencia á Vítima e Atención ao Cidadán se non son parte nun procedemento xudicial?

    Neste caso vostede pode obter información de carácter xeral, relativa aos seguintes aspectos:
    a) Identificación, situación e funcións dos órganos xudiciais e organismos relacionados coa Administración de Xustiza.
    b) Normas de repartición.
    c) Características dos distintos procedementos xudiciais e requisitos para a realización de actuacións concretas.
    d) Lugar, data de celebración e outros datos de interese dos actos xudiciais públicos.
    Tamén pode acceder á información particular sobre un procedemento concreto cando vostede acredite interese lexítimo neste. Se pretende obter este tipo de información, un/unha funcionario/a da oficina derivarallo ao órgano competente para acreditar o interese e, se é o caso, facilitar a información que proceda.

    De que formas podo realizar consultas na Oficina de Asistencia á Vítima e Atención ao Cidadán?

    Pódese acceder á información comunicándose coas oficinas de forma telefónica, solicitando cita previa, por correo electrónico, por escrito ou de forma presencial (ou a través do representante legal acreditado, do procurador ou procuradora ou do avogado ou avogada designados).
    Non obstante, a información particular sobre procedementos concretos só se pode obter cando se solicita de forma presencial na oficina (ou a través dos representantes mencionados) ou por escrito e, en todo caso, previa identificación para comprobar a súa condición de interesado no procedemento.

    Sendo parte nun procedemento xudicial, ¿poderei obter calquera información na Oficina de Asistencia á Vítima e Atención ao Cidadán?

    Non. Existen límites fixados polas leis procesuais, pola Lei Orgánica do Poder Xudicial e pola Lei Orgánica de Protección de Datos Persoais y garantía ds derechos dixitais.
    A Oficina non é a entidade encargada de proporcionarche detalles sobre o contido específico do teu expediente (como a situación das probas, o estado do proceso xudicial, etc.). Para isto, necesitarías dirixirte aos órganos xudiciais correspondentes, ou ben consultar co teu avogado.
    Independentemente do anterior, sendo parte nun procedemento, tes dereito a recibir información particular relativa á fase e estado dos procedementos, á realización dalgún trámite concreto e á identificación das autoridades ou do persoal ao servizo da Administración de Xustiza que interveñan na tramitación dos procedementos.

    ¿Teño que identificarme como vítima de violencia de xénero para que me faciliten información na Oficina de Asistencia á Vítima e Atención á Cidadanía?

    Non. A información facilítase sen comunicar os teus datos de identificación persoal e sen ter que achegar ningún tipo de acreditación da túa situación de violencia de xénero, conservando o teu anonimato, agás que se solicite información sobre un procedemento concreto.

    ¿Podo ir acompañado/a de alguén da miña confianza, que non sexa avogado/a nin procurador/a, para efectuar unha consulta ou solicitude na Oficina de Asistencia ás Vítimas e Atención á Cidadanía?

    Si. O Estatuto da Vítima do delito establece que esta pode estar acompañada, durante a práctica das dilixencias nas que deba intervir, por unha persoa da súa elección, agás resolución motivada en contrario. Igualmente, pode acudir acompañada ás nosas Oficinas pola persoa que elixa.

    Só me facilitan información na Oficina de Asistencia ás Vítimas e Atención á Cidadanía?

    Non. As funcións das nosas Oficinas non se limitan só a facilitar información, senón que tamén prestan a asistencia e axuda necesarias para cubrir impresos e formularios.
    Tamén che ofrecen apoio emocional, orientación sobre o proceso xudicial, asesoramento xurídico e axuda na tramitación de axudas ou compensacións. Ademais, facilitámosche o acceso a medidas de protección, xestionamos trámites administrativos relacionados co caso e poñémoste en contacto con outros servizos de apoio. O seu obxectivo é brindar asistencia integral ás vítimas de delitos, asegurando o seu benestar e facilitando a súa participación no proceso xudicial.

    Os datos que, se é o caso, forneza á Oficina de Asistencia á Vítima, pódenselle comunicar a terceiras persoas?

    Pode facilitarse información a terceiras persoas só nos casos expresamente previstos e cando a vítima o consinta, mais este consentimento debe ser previo e informado.
    Fóra destes supostos, só se pode trasladar a información, e con carácter reservado, á autoridade que adopte unha medida de protección.

    Ten o tribunai de instancia o deber de comunicarme as resolucións xudiciais que se diten, aínda que non compareza como parte no procedemento?

    Dentro dos dereitos básicos do Estatuto da Vítima de delito recóllese o dereito a presentar unha solicitude para que se lle notifiquen unha serie de resolucións procesuais, que se reflicten no artigo 7 da devandita norma.
    Para estes efectos, a vítima designará na súa solicitude unha dirección de correo electrónico e, na súa falta, unha dirección postal ou domicilio, á que serán remitidas as comunicacións e notificacións por parte da autoridade.
    No caso de ser vítima de violencia de xénero non é necesario que presente a solicitude. O tribunai de instancia ten o deber de comunicar as seguintes resolucións:
    • As resolucións que acorden o ingreso en prisión ou a posterior posta en liberdade da persoa infractora, así como a súa posible fuga.
    • As resolucións que acorden a adopción de medidas preventivas persoais ou que modifiquen as xa acordadas, cando teñan por obxecto garantir a seguridade da vítima.

    Cales son as resolucións que o órgano xudicial ten o deber de notificarme, cando o solicite?

    Son as recollidas no artigo 7 do Estatuto da Vítima:
    a) A resolución pola que se acorde non iniciar o procedemento penitenciario.
    b) A sentenza que poña fin ao procedemento.
    c) As resolucións que acorden o ingreso en prisión ou a posterior posta en liberdade do infractor, así como a posible fuga deste.
    d) As resolucións que acorden a adopción de medidas cautelares persoais ou que modifiquen as xa acordadas, cando teñan por obxecto garantir a seguridade da vítima.
    e) As resolucións ou decisións de calquera autoridade xudicial ou penitenciaria que afecten a suxeitos condenados por delitos cometidos con violencia ou intimidación e que supoñan un risco para a seguridade da vítima. Nestes casos e para estes efectos, a Administración penitenciaria comunicará inmediatamente á autoridade xudicial a resolución adoptada para a súa notificación á vítima afectada.

    ¿Cal é o contido da notificación que se me faga, cando proceda?

    Estas comunicacións incluirán, polo menos, a parte dispositiva da resolución e un breve resumo do seu fundamento, e serán remitidas ao seu enderezo de correo electrónico.

    ¿A notificación ten que facerse por algún medio que deixe constancia da súa recepción, como por exemplo por correo certificado con acuse de recibo?

    Non. As comunicacións realízanse por correo electrónico ou, excepcionalmente, se a vítima non dispón dun enderezo de correo electrónico, remitiranse por correo común ao enderezo que facilitase.
    No caso de cidadáns residentes fóra da Unión Europea, se non se dispón dun enderezo de correo electrónico ou postal no que realizar a comunicación, remitirase á oficina diplomática ou consular española no país de residencia para que a publique.

    No caso de ter procurador/a, ¿téñenme que notificar a resolución do mesmo xeito?

    As resolucións teñen que notificarse ao seu/á súa procurador/a e tamén deben comunicarse á vítima no enderezo de correo electrónico que facilitase, se é o caso.

    ¿Podo rexeitar o envío das comunicacións?

    As vítimas, incluídas as de violencia de xénero, poderán manifestar en calquera momento o seu desexo de non seren informadas das resolucións, quedando sen efecto a solicitude realizada.

    ¿Podo comparecer para que se me informe do estado do procedemento?

    Debe facilitárselle, cando o solicite, a información relativa á situación na que se atopa o procedemento, salvo que iso poida prexudicar o correcto desenvolvemento da causa.
    NextGenerationEU
    Plan de Recuperación, Transformación y Resilencia
    Xunta de Galicia

    Xunta de Galicia. Información mantida e publicada en internet pola Xunta de Galicia

    - -